Rinovimi i fundit synon jo vetëm të freskojë mrekullitë e perlës 1,488-vjeçare, por edhe të sigurojë që ajo t'i mbijetojë tërmetit të ardhshëm që mund të godasë qytetin. Nga larg, kupola e saj, shkëmbi vezullues dhe minaret delikate duken se vëzhgojnë Stambollin, siç kanë bërë ndër shekuj. Megjithatë, ndërsa vizitorët afrohen më shumë, ata shohin skela që mbulojnë fasadën lindore dhe një nga minaret. Ndërsa “rinovimi sigurisht që e prek pak atmosferën e pamjes nga jashtë” dhe “skelat i prishin estetikën monumentit... rinovimi është i domosdoshëm”, thotë Abdullah Yilmaz, një guidë. Hagia Sophia, një vend i Trashëgimisë Botërore dhe monumenti më i vizituar i Turqisë, "ka vazhdimisht probleme", thotë për AFP Hasan Firat Diker, një profesor i arkitekturës që punon për restaurimin. Kjo është arsyeja pse ajo i është nënshtruar rinovimeve të shumta, të pjesshme, gjatë shekujve, shtoi ai. Rindërtimi aktual është hera e parë që vendi do t'i nënshtrohet një "restaurimi total", duke përfshirë kupolën, muret dhe minaret. Kur u përfundua në vitin 537 pas Krishtit, në të njëjtin vend ku kishin qëndruar kishat e mëparshme, Hagia Sophia u bë e njohur si një shembull i ndritshëm i arkitekturës së Perandorisë Bizantine, e cila sundonte qytetin e njohur si Kostandinopojë në atë kohë. Ajo shërbeu si kishë deri në rënien e qytetit në duart e osmanëve në vitin 1453, kur u bë xhami. Në vitin 1935, Mustafa Ataturku, themeluesi i Turqisë moderne, i cili e ktheu me forcë Turqinë në një vend laik, e ktheu ndërtesën në muze. Ajo mbeti e tillë deri në vitin 2020, kur presidenti Rexhep Tajip Erdogan, një mysliman praktikant, që erdhi në pushtet në krye të një partie me rrënjë islamike, e ktheu atë në një xhami. Ashtu si banorët e këtij qyteti historik, Hagia Sophia, përballet me rrezikun e vazhdueshëm nga tërmetet që kanë goditur rregullisht metropolin. I fundit i madh u regjistrua në 1999. Qyteti ndodhet vetëm pak km larg një linje sizmie aktive dhe Hagia Sophia, ashtu si edhe shumë ndërtesa në qytetin me 16 milionë banorë, nuk i plotëson standartet për përballimin e tërmeteve.