Dhjetëra të burgosur politikë janë liruar nga burgjet bjelloruse si pjesë e një marrëveshjeje mes udhëheqësit autoritar Alexander Lukashenko dhe Presidentit të SHBA-së Donald Trump. Pesëdhjetë e dy të burgosur janë liruar, përfshirë drejtues sindikatash, gazetarë dhe aktivistë, por më shumë se 1,000 të burgosur politikë mbeten në burg. Në këmbim, SHBA ka thënë se do të lehtësojnë disa sanksione ndaj linjës ajrore bjelloruse Belavia, duke i lejuar asaj të blejë pjesë për avionët e saj. Lirimi i të burgosurve erdhi në prag të stërvitjeve të përbashkëta ushtarake që përfshijnë Bjellorusinë dhe aleaten e ngushtë të saj, Rusinë, dhe pas asaj që Polonia fqinje e quajti një inkursion të paprecedentë rus me dronë në hapësirën e saj ajrore. Lukashenko, i cili është 71 vjeç dhe ka udhëhequr Bjellorusinë që nga viti 1994, duke shtypur zërat kritikë, e përshkroi lirimin e të burgosurve si një gjest humanitar, pas takimit me të dërguarin special të Trump, John Coale, në kryeqytetin Minsk të enjten. Të dy ata diskutuan se si mund të rivendosnin marrëdhëniet tregtare, duke përfshirë rihapjen e ambasadës amerikane në Minsk.