Rusia tha se ka rrëzuar 221 dronë ukrainas gjatë natës, një nga shifrat më të larta të mjeteve fluturuese pa pilot që kur ka nisur lufta mes dy shteteve mbi tre vjet më parë. Ministria ruse e Mbrojtjes tha të premten se sistemet e mbrojtjes ajrore “kanë penguar dhe shkatërruar” dronët, mbi gjysma e të cilëve fluturuan mbi rajonet e Brjanskut dhe Smolenskut. Në mesin e dronëve të rrëzuar përfshihen edhe 28 që Rusia tha se i rrëzoi mbi rajonin e Leningradit. Guvernatori i Leningradit, Aleksandr Drozdenko, tha se shpërtheu një zjarr në një anije në portin e Primoskut, në Detin e Zi, pas sulmeve me dronë në këtë rajon. Forcat ruse të mbrojtjes ajrore thanë se kanë shkatërruar edhe dy dronë që fluturonin drejt Moskës. Kryetari i bashkisë së kryeqytetit rus, Sergei Sobyanin, e njoftoi lajmin në kanalin e tij Telegram, sipas agjencisë së lajmeve Tass. "Forcat e mbrojtjes ajrore të Ministrisë së Mbrojtjes kanë shkatërruar dy dronë armik që fluturonin drejt Moskës. Specialistët e shërbimeve të emergjencës po punojnë në vendin e ngjarjes", thuhej në deklaratë. Kryetari i bashkisë më vonë raportoi se një sulm tjetër me shtatë dronë ishte zmbrapsur. Sulmet vijnë pasi Polonia, që gjendet në kufi me Ukrainën, më herët gjatë javës tha se kishte rrëzuar dronë rusë që hynë në hapësirën e saj ajrore. Moska mohoi se kishte shënjestruar Poloninë, por tha se kishte kryer një sulm ajror në Ukrainën perëndimore. Megjithatë, Franca dhe Gjermania ndërmorën hapa për të forcuar mbrojtjen në hapësirën ajrore polake, ndërsa Këshilli i Sigurimit i Kombeve të Bashkuara ka thirrur një mbledhje urgjente për të diskutuar për çështjen e inkursionit rus në Poloni.