Sekretari i përgjithshëm i NATO-s, Mark Rutte, njoftoi të premten nisjen e një operacioni të ri, të quajtur “Roja Lindore”, për të mbrojtur më mirë krahun lindor të aleancës që kufizohet me Bjellorusinë, Rusinë dhe Ukrainën, pas incidentit të kësaj jave me dron në Poloni. “Roja Lindore” do të operojë në bashkëpunim të shteteve anëtare, duke përfshirë asete nga Danimarka, Franca, Mbretëria e Bashkuar, Gjermania dhe të tjerë, sipas Ruttes. “Ky operacion do ti japë fleksibilitet dhe fuqi forcave tona dhe do ta bëjë më të qartë, se si aleancë mbrojtëse, jemi gjithmonë të gatshëm të mbrohemi”, ka thënë ai. Rutte theksoi se sulmi i Rusisë me dronë në Poloni nuk ka qenë incident i izoluar teksa e ka quajtur të rrezikshëm dhe të papranueshëm. Dronë të shumtë rusë kaluan në Poloni të mërkurën, duke bërë që NATO të aktivizonte avionë luftarakë për t'i rrëzuar. Rusia reagoi duke thënë se nuk kishte në shënjestër Poloninë, por udhëheqësit evropianë u shprehën të sigurt se inkursionet ishin provokim i qëllimshëm nga Rusia.