Hyrja e dronëve rusë në poloni dhe ndërhyrja ushtarake e natos kundër tyre, për të parën herë që nga pushtimi rus i ukrainës në shkurt 2022, alarmoi vendet perëndimore dhe duket sikur e solli perspektivën e një lufte më të gjerë në kontinent, më pranë. Analistë perëndimor por edhe propagandistë rusë e kanë përmendur shpesh Poloninë si shënjestrën e radhës së Putinit, pas Ukrainës, aq sa vendi nxitoi të armatosej e forcohej që nga fillimet e luftës në fqinjin e tij. Por ndërkohë, Polonia ka një histori të gjatë lufte me Rusinë, që shtrihet në qindra vjet më parë në kohën e Ivanit të Tmerrshëm, dhe shpesh ajo ka qenë në vijën e parë, duke mbrojtur Evropën kundër Moskës. Në vitin 1920, vendit iu atribuua ndalimi i përhapjes së komunizmit në Evropë kur ushtritë e saj kthyen Trockin prapa në një betejë të njohur si "Mrekullia në Vistula". Më pak se 20 vjet më vonë, pushtimi i përbashkët i Polonisë nga sovjetikët e Stalinit dhe nazistët e Hitlerit filloi Luftën e Dytë Botërore, me vendin që mbeti nën kthetrat e Bashkimit sovjetik deri në vitin 1989. Pra, kur Putini pushtoi Ukrainën vitin e kaluar duke thënë se kishte ardhur për të rimarrë tokat historike ruse, mbajtësit e pushtetit në Varshavë nuk kishin iluzione se edhe ata ishin në rrezik. E brenda pak javësh Varshava firmosi marrëveshje për tanke amerikane e koreanojugore, sisteme amerikane raketash, avionë luftarakë e luftanije.