Një i dyshuar për vrasjen e aktivistit konservator Charlie Kirk në një universitet të Utah-s është në paraburgim, tha të premten Presidenti i SHBA-së Donald Trump, duke i dhënë fund një kërkimi intensiv që pasoi atë që Trump e përshkroi si një "vrasje të tmerrshme". Vrasësi i Kirk-ut i kishte shpëtuar policisë dhe agjentëve federalë për më shumë se 24 orë pas të shtënave të së mërkurës, në të cilat një snajper qëlloi me një plumb të vetëm 31 vjecarin Kirk, gjatë një paraqitjeje të tij në Universitetin e Luginës së Utah-s në Orem. "Mendoj se e kemi kapur," tha Trump në një intervistë për emisionin "Fox and Friends", duke shtuar se një person që e njeh të dyshuarin e kishte dorëzuar atë. "Mendoj se me një shkallë të lartë sigurie e kemi në paraburgim", shtoi ai. Trump nuk e ndau identitetin e të dyshuarit. I dyshuari sipas burimeve është në paraburgim në Utah. Më herët, hetuesit amerikanë thanë se kishin gjetur pushkën që besohet se është përdorur për të vrarë Kirk-un dhe publikuan imazhe të një personi të kërkuar. FBI-ja kishte qarkulluar imazhe të paqarta që me sa duket ishin marrë nga kamerat e sigurisë, duke treguar një person që mbante një bluzë të zezë, syze dielli dhe një kapelë bejsbolli të errët. Zyrtarët e zbatimit të ligjit publikuan gjithashtu një video të personit që qëllon duke vrapuar nëpër çati dhe duke u hedhur në tokë. "Dikush kaq afër njeh edhe një anim të vogël të kokës, gjë që askush tjetër nuk do ta bënte," tha Trump në intervistë. Trump tha se i dyshuari u njoh nga njerëz të afërt të tij dhe sugjeroi që babai i të dyshuarit e kishte cuar atë në një stacion policie për ta dorëzuar.