Kjo e premte nisi me një aksion policor, për goditjen e paligjshmërisë ndaj subjekteve të cilat, ushtrojnë aktivitetin e transportit të pasagjerëve, pa qenë të pajisur me licencat përkatëse. Aksionet policore u fokusuan kryesisht në Tiranë, në rrugët hyrëse dhe dalëse të kryeytetit. Nga kontrollet e ushtruara janë konstatuar një sërë drejtuesish mjetesh të cilët ushtronin aktivitetin e transportit të pasagjerëve pa qenë të pajisur me licencë, apo raste ku licenca kishte kaluar afatin e vlefshmërisë. Nga burimet policore, bëhet e ditur se vetëm në pak orë, janë ndëshkuar afro 10 subjekte. Sipas policisë, aksioni në ditët në vijim do të vazhdojë edhe në rrethe, ku po ashtu mjetet e transportit do të kontrollohen për licensat e qarkullimit. Ky aksion policor në bashkëpunim me task forcën rrugore, erdhi një ditë pasi ministrja e infrastrukturës Belinda Balluku paralajmëroi nisjen e një aksioni të gjerë kundër goditjes së paligjshme në transportin publik të pasagjerëve dhe që do të vijojë edhe në javët në vijim në të gjitha akset rrugore të vendit. Ky vendim u mor gjatë një takimi që ministrja zhvilloi me përfaqësuesit e Shoqatave të Transportit Publik, të cilët ngritën si shqetësim ushtrimin e aktivitetit nga ana e subjekteve të pa pajisur me licenca.