Partia Drejtësi, Integrim dhe Unitet së bashku me shoqatën “Çamëria” kanë paralajmëruar organizimin e një proteste para ministrisë për Evropën dhe Punët e Jashtme. Gjatë kohës që aty do të mbërrijë për takimin zyrtar i ministri i jashtëm i Greqisë Nikos Dendias. Përmes një njoftimi të përbashkët PDIU dhe shoqata “Çamëria” u kanë bërë thirrje qytetarëve shqiptarë dhe shoqatave të tjera patriotike që të bashkohen në proteste, pasi gjatë vizitës së kryediplomatit grek nuk parashikohet asnjë nga çështjet që shqetësëojnë shqiptarët. “ I bëjmë thirrje qeverisë shqiptare të marrë parasysh axhendën e BE, e shprehuar nga ish komisioneri Hahn, e cila përcakton si çështje: zgjidhjen çështjes çame, heqjen e ligjit të luftës, marrëveshjene detit. Problemet me Greqinë zgjidhen vetëm me dinjitet, reciprocitet dhe dije.Shqipëria nuk ka më as det, as tokë për të falur”, thuhet ne njoftimin e PDIU. Në mbështetje të protestes së paralajmeruar nga PDIU është shprehur edhe dega e lëvizjes Vetëvendosje në Shqipëri. “Çështjet që ngrihen në këtë tubim paqësor janë në përputhje me qëndrimet e bëra publike në vazhdimësi nga Qendra e Lëvizjes VETËVENDOSJE! në Shqipëri. Qeveria e Shqipërisë nuk duhet të përfshihet në pazare me territoret e vendit, aq më pak në një çështje e cila mban verdiktin unanim të Gjykatës Kushtetuese”, thuhet ne njoftimin e vetëvendosjes në Shqipëri.