Komisioni Qendror Zgjedhor i Bosnjë dhe Hercegovinës, gjatë një mbledhjeje në Sarajevë ka miratuar vendimin për t’i hequr mandatin presidentit të entitetit të Republikës Sërpska, Milorad Dodik. Kjo masë vjen pas një vendimi të formës së prerë të Gjykatës së Bosnjës dhe Hercegovinës, e cila e ka dënuar Dodikun me një vit burg dhe ndalim të ushtrimit të funksioneve politike për gjashtë vitet e ardhshme, për shkak të mosrespektimit të vendimeve të Përfaqësuesit të Lartë në vend. Mandati i Dodikut do të përfundojë zyrtarisht pas skadimit të afatit dyditor për paraqitjen e ankesës. Pas përfundimit të këtij procesi ligjor, pritet që të shpallen zgjedhje të parakohshme për presidentin e entitetit Republika Sërpska, të cilat duhet të mbahen brenda 90 ditëve. Ndërkohë, zgjedhjet e rregullta të përgjithshme janë planifikuar të mbahen në tetor të vitit 2026. Pavarësisht vendimit të Gjykatës, Dodik ka deklaruar se nuk ka ndërmend të tërhiqet nga posti i presidentit të Republikës Sërpska..