Një vit pasi zjarret në greqi morën më shumë se 20 jetë njerëzish, një dimër i ngrohtë si rrallë herë më parë dhe temperaturat e larta të pranverës po ndezin frikën për një verë tjetër të vështirë. Sipas Observatorit Kombëtar të Athinës, zjarret në vitin 2023 shkrumbuan afro 175,000 hektarë pyje dhe tokë bujqësore pas një valë të nxehti dy-javore, më e gjata e regjistruar ndonjëherë. Temperatura maksimale arriti deri në 46.4 gradë Celsius në Peloponez. "Ne e dimë se do të kemi një verë shumë të vështirë," tha ministri i mbrojtjes civile Vassilis Kikilias në një intervistë për AFP. "Askush nuk mund të parashikojë saktësisht kushtet me të cilat do të përballemi. Por cilatdo qofshin ato, ne jemi të detyruar të luftojmë fort," tha ai. Vera e vitit të kaluar u pasua nga "dimri më i ngrohtë i regjistruar" ndonjëherë në Greqi dhe prilli rezultoi gjithashtu me temperatura më të larta se normalja, thotë drejtori i kërkimit në Observatorin Kombëtar, Kostas Lagouvardos. Statistikisht, kjo nuk është një shenjë e mirë. "Ne zbulojmë se gjatë viteve të temperaturave të larta të qëndrueshme, që shoqërohen me thatësira, kemi zjarre të mëdha," i tha Lagouvardos AFP-së. Temperaturat e larta rekord janë regjistruar në Greqi gjatë javës së parë të qershorit, me mërkurin në termometër që është ngritur deri në 39.3 Celsius. Një nga zjarret më shkatërrimtare të vitit të kaluar, në parkun kombëtar të Dadia-s, i cili vrau 19 emigrantë, ishte jashtë kontrollit për javë të tëra në gusht. Më vonë ai u klasifikua si zjarri më i madh i regjistruar ndonjëherë në Bashkimin Evropian.Në korrik, Greqia u angazhua në përpjekjen më të madhe të saj në histori kundër zjarreve, duke evakuuar rreth 20,000 turistë nga ishulli i Rodosit, ndërsa flakët rrethuan hotelet luksoze. Njerëzit u panë duke vrapuar drejt detit, me fëmijë në krah, për t’i shpëtuar flakëve. Tani, zjarret e para kanë shpërthyer në greqi, dhe ekspertët flasin për një paralajmërim ogurzi për vendin.