Papa Leoni ka debutuar me një stil të ri dhe të fuqishëm në turneun e tij në katër vende të Afrikës këtë javë, duke denoncuar ashpër luftën dhe pabarazinë, çka edhe ka shkaktuar sulme të përsëritura ndaj Papës nga Presidenti amerikan Donald Trump. Ndryshimi në retorikë pasqyron shqetësimin në rritje të Leonit me lidershipin global, thonë ekspertët, pasi ai mbajti një profil relativisht të ulët për një Papë gjatë 10 muajve të parë të papatit të tij. Trump e sulmoi për herë të parë Leonin duke e quajtur atë "të tmerrshëm" të dielën, në një përgjigje ndaj kritikave të Papës për luftën e SHBA-së dhe Izraelit kundër Iranit. Ai lëshoi më shumë kritika të enjten, duke sugjeruar se Papa nuk i kuptonte çështjet e politikës së jashtme. Papa i parë amerikan që foli më herët atë ditë në Kamerun, kishte thënë se bota po "shkatërrohej nga një grusht tiranësh", pa përmendur individë. Ai kritikoi udhëheqësit që shpenzojnë miliarda për luftëra dhe që manipulojnë edhe me emrin e zotit për përfitimin e tyre. "Normalisht papët dhe Vatikani janë të kujdesshëm kur bëhet fjalë për politikën ndërkombëtare, duke preferuar diplomacinë ndaj censurës publike", thotë John Thavis, një korrespondent në pension i Vatikanit që mbuloi tre papë. "Leoni duket i bindur se bota ka nevojë të dëgjojë dënimin e qartë të padrejtësisë dhe agresionit, dhe ai duket i vetëdijshëm se është një nga shumë pak njerëz që kanë një foltore globale." Papët kanë qenë prej kohësh një zë moral në skenën globale, duke denoncuar me zë të lartë situatat e padrejtësisë. Por ata gjithashtu janë përpjekur përgjithësisht që Kisha të mbetet neutrale në konfliktet botërore, duke i lejuar Vatikanit të veprojë si ndërmjetës nëse i kërkohet ta bëjë këtë.