Një shef kuzhine, italian, u pushua nga puna në një restorant në Brisbane, pasi refuzoi të vendoste ananas në një picë, me arsyetimin se kjo ishte një "fyerje për kulturën e tij". Davide Tamburella u pushua nga puna në restorantin "La Costa", i cili tashmë është mbyllur, në muajin maj, dy javë pas një takimi me drejtuesit, të cilët kishin një sërë ankesash lidhur me sjelljen e tij. Ndër to ishte edhe refuzimi i Tamburellës për të përgatitur pica me proshutë dhe ananas për klientët në një event. Në atë kohë, shefi i kuzhinës kishte deklaruar se çdo udhëzim nga drejtuesit "nuk duhet të zbatohet nëse është fyes për kulturën e tij". Këto detaje dolën në dritë pasi shefi i kuzhinës iu drejtua Komisionit për të Drejtat në Punë të Australisë, duke pretenduar se ishte pushuar nga puna në mënyrë të padrejtë. Në vendimin e publikuar të martën, komisioni vuri në dukje se refuzimi i Tamburellës për të vendosur ananas në picë vinte nga fakti se "ai, si italian, e konsideron vendosjen e ananasit në picë si një fyerje për kulturën e tij". Gjithashtu u theksua se kjo ishte hera e tretë në katër vitet e fundit që Tamburella refuzonte të përdorte këtë frut në pica. Më herët, ai i kishte kërkuar eprorit të tij që "të verifikonte se sa e rëndësishme është për italianët që të mos vendosin ananas në picë". Shteti i Queensland-it, ku ndodhet restoranti, konsiderohet si qendra kryesore e prodhimit të ananasit në Australi; aty kultivohet i gjithë ananasi që prodhohet komercialisht në vend.