Në më shumë se katër vjet luftë, shumëkush mund të mendojë se rusët janë bërë imunë ndaj shkatërrimit të shkaktuar nga sulmet me dronë, si ai që goditi Shën Petersburgun të mërkurën por edhe të shtunën. Ukrainasit janë të detyruar të përjetojnë të njëjtën gjë, çdo ditë, ashtu si banorët e disa rajoneve ruse që kufizohen me vendin që Putin pushtoi. Por vendlindja e Vladimir Putinit rrallë e ka dëgjuar zhurmën ogurzezë të dronëve para shpërthimeve shurdhuese dhe shpesh vdekjeprurëse. Ukraina e çoi luftën në Rusi, ndërsa Putini organizoi versionin e tij madhështor të Forumit Ekonomik Botëror të Davosit në Shën Petersburg, në qytetin historik ku ai u rrit. Terminali i naftës i qytetit u përfshi të mërkurën nga flakët dhe një anije detare me vlerë 150 milionë dollarëshe, Boykiy, u shkatërrua në bazën ushtarake Kronstadt aty pranë, ku ndodhet selia e Flotës Baltike të Rusisë. Në të gjithë qytetin, shpërthyen zjarre ndërsa u goditën objektiva infrastrukturore. Ironia e sloganit të forumit, "rruga drejt një të ardhmeje të qëndrueshme", nuk i shpëtoi 20,000 delegatëve të tij nga më shumë se 130 vende, ndërsa një kolonë e madhe tymi nga rafineria e naftës e Shën Petersburgut, varej mbi qytet. Dhe ky ishte një poshtërim tronditës për Putinin, i cili duhej të fliste në konferencë, dhe tmerrues për banorët. "Na kanë bombarduar për dy orë", thotë një 45 vjecare nga Shën Petersburgu pas sulmit me dronët me rreze të gjatë veprimi "Liutyi" të Ukrainës. "Nuk mund të fle." E gjeta djalin tim me kokën poshtë jastëkut. Çfarë të them? Kjo është shija e ilaçit tonë”, thotë ajo.