Presidenti i SHBA-së, Donald Trump ka ulur pritshmëritë para takimit me Putinin të premten por ndërkohë ai ka hedhur një ide për shkëmbim territoresh që ka shkaktuar debate të shumta. "Ndoshta do të them: 'Paç fat dhe vazhdo të luftosh'. Ose ndoshta do të them: 'Mund të bëjmë një marrëveshje'", tha Trump ndërsa fliste para gazetarëve. Në lidhje me shkëmbimin e territoreve të përmendur prej tij, presidenti ukrainas Volodymyr Zelenski, ka hedhur tashmë poshtë mundësinë dhënien së tokave Rusisë në këmbim të përfundimit të luftimeve. Dhe për Trumpin, qëndrimi i Zelenskit për këtë çështje "është shqetësues", sepse sipas tij "do të ketë një lloj shkëmbimi". Presidenti amerikan tha sidoqoftë se pret një "bisedë konstruktive" me Putinin. "Do të flas me Vladimir Putinin dhe do t'i them: 'Duhet t'i japësh fund kësaj lufte'". Ai sugjeroi gjithashtu një takim tripalësh me Putinin dhe Zelenskin në të ardhmen. "Takimi tjetër do të jetë me Zelenskin dhe Putinin. Do të jem atje nëse ata kanë nevojë për mua", tha Trump. Takimi në Alaska do të jetë takimi i parë ballë për ballë midis dy udhëheqësve që nga pushtimi i Ukrainës nga Rusia në shkurt 2022. Trump dhe Putin kanë biseduar disa herë në telefon gjatë muajve të fundit, por nuk janë takuar personalisht.