Një objekt misterioz ndëryjor i zbuluar javën e kaluar nga astronomët mund të jetë kometa më e vjetër e parë ndonjëherë, sipas shkencëtarëve. E quajtur 3I/Atlas, ajo mund të jetë tre miliardë vjet më e vjetër se sistemi ynë diellor, sugjeron ekipi nga universiteti i Oksfordit. Kjo është vetëm hera e tretë që kemi zbuluar një objekt që ka ardhur nga përtej sistemit tonë diellor – thanë studiuesit. Gjetjet paraprake u prezantuan të premten në takimin kombëtar të Shoqërisë Mbretërore Astronomike të Mbretërisë së Bashkuar në Durham. "Jemi të gjithë shumë të emocionuar nga 3I/Atlas," tha astronomi i Universitetit të Oksfordit, Mattheë Hopkins, për BBC. Ai thotë se objekti mund të jetë më shumë se shtatë miliardë vjeç dhe mund të jetë vizitori më i shquar ndëryjor deri më tani. 3I/Atlas u vu re për herë të parë më 1 korrik 2025 nga teleskopi i studimit ATLAS në Kili, kur ishte rreth 670 milionë km larg Diellit. Që atëherë, astronomët në të gjithë botën kanë qenë në garë për të identifikuar rrugën e kometës dhe për të zbuluar më shumë detaje rreth saj.