Punëtorët në mbarë botën kanë nevojë për mbrojtje më të mirë nga nxehtësia ekstreme, pasi ndryshimi i klimës shkakton valë më të shpeshta të nxehtësisë - ky është përfundimi i një raporti të ri nga Organizata Botërore e Shëndetësisë dhe Organizata Botërore Meteorologjike. Raporti thotë se miliona punëtorë janë të ekspozuar ndaj stresit nga nxehtësia, i cili ndikon në shëndetin dhe performancën e tyre. Ai u bën thirrje qeverive, punëdhënësve dhe punëtorëve të bashkëpunojnë për të zhvilluar strategji përshtatjeje. Edhe pse OBSH ka paralajmëruar shumë herë për rreziqet shëndetësore të nxehtësisë ekstreme, ky është raporti i saj i parë që nga viti 1969 posaçërisht mbi stresin nga nxehtësia në punë. Drejtori i OBSH-së për mjedisin, klimën dhe shëndetin, Rüdiger Krech, thotë se përfundimet e raportit duhet të jenë një thirrje zgjimi. "Nuk është vetëm shqetësim. Është një rrezik i vërtetë për shëndetin", i tha ai BBC-së. "Nëse punoni në nxehtësi dhe temperatura e trupit tuaj rritet në mbi 38°C, atëherë jeni të rrezikuar nga stresi i rëndë, i lidhur me nxehtësinë dhe goditja në tru, dështimi i veshkave, dehidratimi", etj.