Me 3 rezultate në favor të tij, përkatësisht Kuvendin e 11 dhjetorit, referendumin e 18 dhjetorit dhe fitoren përballë Lulzim Bashës në zgjedhjet e pjesshme të 6 marsit, Sali Berisha ka nisur përpjekjet për bashkimin e demokratëve, e në plan të parë duhet të ishte i qetë. Por rrethanat e zhvillimet e fundit nuk flasin për aspak qetësi, kur vjen fjala për emrin e Presidentit të ri. Berisha nga Kuvendi foli për blerje deputetësh nga Rama, për votimin e një presidenti që në raundin e parë. Këto akuza i përforcoi edhe në një dalje televizive ku do të shprehej se po flitet edhe për emrin e Bashës si President. Por përse Sali Berisha nuk është i qetë, pavarësisht 3 rezultateve në favor të tij? Ekzistenca e 10 deputetëve që përkrahin akoma Lulzim Bashën, popr edhe grupit tjetër me 17 deputetë kritikë të të dy palëve, e vë rolin e Berishës në pikëpyetje, kur vjen puna për Presidentin e ri. Votat e 10 deputetëve të Bashës do të ishin më se mjaftueshëm që Edi Rama së bashku me deputetët e Partisë Socialdemokrate, të zgjidhnin presidentin, duke shpërfillur Berishën. Në këtë mënyrë 3 fitoret e Berishës nuk do të kishin rëndësinë e duhur, jashtë Partisë Demokratike. Aq më tepër kur duket se mbështetësit e Bashës dhe kritikët e pozicionuar kundër të dy liderëve, kanë mbështetjen ndërkombëtare, përballë liderit historik ‘non grata’ në SHBA. Një përkrahje e tillë jo thjesht nxjerr një president jashtë ndikimit e pëlqimit të Berishës, por edhe shkakton efekt domino, minimizimin e rolit të tij politik, jashtë selisë blu. Presidenti i ri dhe mundësia e bashkëpunimit të Ramës me deputetët e Bashës apo ata që janë kritikë ndaj dy liderëve demokrat, ka shkaktuar një konflikt të ri në PD, e për zgjidhjen e tij duhet pritur 30 prilli, kur do të mbahet Kuvendi i Kombëtar. A do të kemi një paqe e bashkim mes demokratëve? A mund të jetë Lulzim Basha një figurë konsensuale për President dhe a do ta pranojë këtë Berisha? Këto janë pyetjet që pritet të marrin përgjigje në ditët në vijim, teksa anëtarët e Komisionit të Rithemelimit shprehen se në asnjë mbledhje nuk është diskutuar për emrin e Bashës për President.