Në fillim të marsit, anëtarët e Policisë Kombëtare Spanjolle kontrolluan një zonë pyjore pranë Marbejës në kërkim të një sasie të madhe kokaine. Pati edhe një përplasje. Trafikantët e drogës, të maskuar si oficerë policie, hapën zjarr ndaj oficerëve me pistoleta automatike. Në automjetet e tyre u gjetën AK-47, tha më vonë Policia Kombëtare në një deklaratë. Sipas hetuesve spanjollë, ky nuk është një rast i izoluar. Pothuajse çdo javë, përveç kokainës, sekuestrohen edhe armë dhe municione ushtarake. Për policinë, ky është një problem në rritje. Mes municioneve të sekuestruara ka edhe fishekë standard të NATO-s, që vijnë nga evropa lindore, nga lufta në Ukrainë. Zbulimet e policisë spanjolle tregojnë kështu se armët dhe municionet përfundojnë nga fushat e betejës ukrainase në tregun e zi evropian. Dhe kjo ndodh jo vetëm në Spanjë, por në të gjithë Evropën, ku policia sekuestron rregullisht sasi të mëdha armësh, përfshirë armë ushtarake, gjatë operacioneve të saj. Zyrtarët në nivelin e Bashkimit Evropian e kishin këtë shqetësim që në fillim të luftës në ukrainë kur aleatët filluan furnizimet.