Presidenti turk, Recep Tayyip Erdogan, e ka krahasuar kryeministrin izraelit, Benjamin Netanyahu, me Adolf Hitlerin, duke paralajmëruar se edhe ai do të vuajë të njëjtin fat. “Ata që ndjekin gjurmët e Hitlerit do të përfundojnë siç kanë përfunduar të gjithë tiranët gjatë historisë”, tha ai në një aktivitet në Ankara të enjten ku organizoi një ceremoni çmimesh të Shoqatës së Gjysmëhënës së Kuqe Turke ku vlerësoi ndihmën humnaitare veçanërisht në Gaza. Erdogan vazhdoi gjithashtu kritikat e tij të ashpra ndaj Izraelit. Erdogan i krahasoi sulmet e Izraelit në të gjithë rajonin me ato të "një peshkaqeni që nuhat gjak". «Përfundimisht, ata do të paguajnë për krimet e tyre», deklaroi ai. “Nën administratën e saj aktuale, Izraeli nuk është gjë tjetër veçse një fabrikë që prodhon paqëndrueshmëri dhe kaos, duke u ushqyer me gjak dhe lot”, deklaroi presidenti turk më tej gjatë fjalimit. Turqia është një kritike e ashpër e Izraelit dhe një nga vendet e pakta në rajonin e saj që sfidon hapur fushatën e bombardimeve që Netanyahu ka ndëmrarrë kundër vendeve armike përgjatë Lindjes së Mesme. Për Ankaranë, Izraeli është pengesa më e madhe për paqen në rajonin e gjerë.