Pas 25 ditësh grevë urie, naftëtarët e Ballshit kanë pranuar kërkesën e kryeministrit Edi Rama, ndërsa kërkojnë të fillojnë dialogun me të ditën e hwnw. Megjithatë, ata kanë paralajmëruar se nëse nuk marrin një zgjidhje, do t’i rikthehen sërish grevës. “Jemi për dialog, jemi shkëputur nga familja. Nëse Kryeministri nuk na jep njw zgjidhje, do t’i rikthemi sërish grevës”, shprehen ata. Prej muajsh tashmë, naftëtarët e Ballshit kërkojnë të marrin pagat e prapambetur si dhe të rifillojnë punën. Ata kanë protestuar disa here para Ministrisë së Transportit, duke mos gjetur një zgjidhje e duke u futur më pas në grevë urie. Megjithatë, kryeministri Edi Rama pati theksuar se nuk ishte kjo mënyra e duhur për ta adresuar problemin, duke i bërë thirrje që të dalin nga greva, në mënyrë që të fillonte një dialog për të gjetur zgjidhje për situatën e tyre. Kwsisoj, thirrja e kryeministrit u dëgjua nga naftëtarët, të cilët theksojnë se nuk lëvizin nga kërkesat e tyre. Pas vendimit të naftëtareve për të mbyllur grevën dhe për të dialoguar, ka reaguar menjëherë kryeministri Edi Rama, i cili shprehet se është lajm shumë i mirë. Përmes një postimi në "Twitter", kreu i qeverisë kërkon që ato të caktojnë përfaqësinë, duke premtuar se do të jetë vetë atje. Më vjen keq për kaq shumë ditë mundim të panevojshëm, përderisa jo vetëm kemi qenë plotësisht të ndjeshëm ndaj hallit tuaj, po edhe të gatshëm ta qajmë hallin së bashku! Tani caktoni përfaqësinë dhe nesër do të jem vetë aty me ju”- shkruan Rama në Twitter.