Rritet sërish çmimi i naftës dhe benzinës në pikat e shpërndarjes së karburaneteve. Në mbledhjen e kësaj të mërkure të bordit të transparencës, u vendos rritja e çmimit tavan të tregtimit të naftës, duke reflektuar edhe shtrenjtimin e karburanteve në bursat ndërkombëtare. Sipas këtij vendimi në pikat e pakicës, nafta do të tregtohet me 233 lekë për litër, nga 221 që ishte një ditë më parë. Ndërkohë një litër benzinë do të tregtohet me 218 lekë. Çmimi i gazit vijon të jetë i pandryshuar në kufirin e 93 lekë për litër. Ndërkohë në pikat e shumicës, nafta tregtohet me 227 lekë për litër, ndërsa një litër benzinë me 208 lekë.