Aksi rrugor Elbasan-Librazhd, në vendin e quajtur Ura e Murrashit prej vitesh vijon të jetë një nga akset më problematike që paraqet rrezikshmëri të lartë, kjo për shkak të rrëshqitjes së gurëve dhe pranisë së inerteve në rrugë. Si pasojë e motit të keq, ku reshje të dendura shiu ka patur thuajse në të gjithë vendin, aksi rrugor Elbasan-Librazhd është bllokuar dhe lëvizja kryhet vetëm në një korsi. Policia rrugore në një njoftim zyrtar apelon të gjithë drejtuesit e mjeteve të mos kryejnë parakalime të gabuara, të vendosin rripin e sigurimit, të mos përdorin celularin gjatë drejtimit të mjetit, si dhe të mos drejtojnë automjetet apo motomjetet nën efektin e alkoolit apo në gjendje të dehur. Bëhet me dije se të gjitha akset e tjera rrugore janë të kalueshme, me përjksahtim të këtij aksi. Policia rrugore ndodhet në terren për të drejtuar qarkullimin rrugor, me qëllim parandalimin e aksidenteve rrugore, si dhe për t'i ardhur në ndihmë çdo drejtuesi mjeti që mund të ketë probleme. Nga ana e firmës kontraktore po punohet për zhbllokimin e plotë të rrugës.