Për jetësimin e Marrëveshjes për Asociacionin e komunave me shumicë serbe në Kosovë, për të cilin Prishtina dhe Beogradi u pajtuan dhjetë vjet më parë, aktualisht ekzistojnë katër draft-statute dhe draft-vizione. Qeveria e Kosovës deri më tani ka refuzuar që ta themelojë Asociacionin, me arsyetimin se kompetencat e gjera të tij do ta kërcënonin funksionalitetin e brendshëm të shtetit. Megjithatë, kryeministri i Kosovës, Albin Kurti, ka paraqitur edhe vetë një draft-vizion për “vetëmenaxhimin e komunitetit serb”, sipas modelit kroat, sic tha ai. Këtë draft, Kurti e prezantoi në Bruksel më 2 maj dhe tha se ai rregullon funksionimin e komunitetit serb në Kosovë.