Kryeministri grek, Kiriakos Mitsotakis udhëtoi këtë të mërkurë në krye të një delegacioni me dhjetë ministra të kabinetit për të takuar në Ankara, Presidentin turk, Recep Taip Erdogan. Takimi vjen mes atmosferës së ndezur me tensione mes dy vendeve në lidhje me zonat ekskluzive ekonomike në Egje, pas njoftimit të Athinës pak kohë më parë për zgjerimin me 12 milje të ujërave të saj territorial. Mitsotakis ka deklaruar në mënyrë të përsëritur publikisht se do t’i parashtrojë presidentit turk çështjen e casus belli, të ashtuquajturave “zona gri” dhe të çmilitarizimit, tema që janë rikthyer në orët e fundit në qendër të vëmendjes nga pala turke. Nga ana tjetër, delimitimi i zonave detare – e vetmja mosmarrëveshje që Athina pranon si juridike – nuk është pjesë e agjendës, pasi aktualisht nuk ekzistojnë kushtet për negociata.