Të paktën tre protestues kanë mbetur të lënduar mbrëmjen e 16 shkurtit në protestën e organizuar në qytetin e Novi Sadit, kundër Qeverisë së Serbisë. Studentët akuzuan mbështetësit e partisë në pushtet, se i sulmuan para ndërtesës së Teatrit Kombëtar Serb. Sipas dëshmitarëve, mbështetëtit e Partisë Përparimtare Serbe u vërsulën drejt grupit të studentëve dhe gazetarëve të mbledhur për të protestuar para teatrit. Rreth tubuesve ishin vendosur forca të shumta policore. ““Nuk e di se si filloi, ndoshta i njohën që ‘nuk ishin nga grupi i tyre’. Pashë një djalë që po e godisnin në kokë, një vajzë e rrëzuan në tokë dhe e shqelmuan”, tha një prej protestuesve. Protestat kundër qeverisë serbe, vazhdojnë për më shumë se 15 muaj. Tubimet nisën pas incidentit në stacionin hekurodhor të Novi Sadit, ku humbën jetën 16 persona, në nëntor të vitit 2024. Protestat nisën me thirrjen për vënien në vend të përgjegjësisë, për të vazhduar më pas me kërkesat për zgjedhje të jashtëzakonshme dhe dorëheqjen e pushtetit.