Në ditën e parë të shkollës pas pushimeve, miliona nxënës nw Francw nderuan mwsuesin e vrarw, Samuel Paty, I cili u bw viktimw e njw sulmi terrorist. "Ne jemi Franca! Do të qëndrojmë së bashku", shkroi Presidenti francez Emmanuel Macron në një mesazh në rrjetet sociale. Kryeministri francez Jean Castex dhe ministri i Arsimit, Jean-Michel Blanquer vizituan shkolla në periferinë e Parisit, Conflans-Sainte-Honorine, ku kishte punuar 47 vjecari. Paty u kujtua gjithashtu në Gjermani, ndër të tjera në shkolla në Hamburg, Berlin dhe Hesse. Sipas hetuesve, Patyn e vrau një 18-vjeçar në mes të tetorit, sepse në orën e mësimit me temën e lirisë së shprehjes ai u tregoi nxënësve karikaturat e profetit Muhamed. Trupi i tij u gjet me kokë të prerë. Akti shkaktoi tmerr të madh në Francë. Më pak se dy javë më vonë, tre persona vdiqën në një sulm me thikë në një kishë në Nisë - edhe këtu Prokuroria beson se kemi të bëjmë me një sulm islamist. Macroni e mbrojti lirinë e shprehjes dhe botimin e karikaturave pas vrasjes së Paty-së. Kjo çoi në protesta në vende të shumta myslimane. Rreth 400 vetë demonstruan përsëri përpara ambasadës franceze në kryeqytetin indonezian Xhakartë. Në Daka, kryeqyteti i Bangladeshit, gati 10.000 vetë dolën në rrugë e bwnw thirrje për bojkotim të mallrave franceze dhe ndërprerjen e marrëdhënieve diplomatike midis Bangladeshit dhe Francës. Pas tre sulmeve terroriste në javët e fundit me disa të vrarë, qeveria franceze e ka shtuar mbrojtjen e shkollave dhe vendeve të kultit. Për këtë qëllim janë angazhuar edhe ushtarë të misionit antiterror "Sentinelle". Pamjet: AFP