Një gjykatë ruse zhvilloi të hënën një seancë dëgjimore sekrete për spiunazh kundër një studiuesi francez i cili tashmë po vuan një dënim me tre vjet burg, një nga shumë të dënuarit perëndimor që nga nisja e luftës në Ukrainë. Laurent Vinatier, një studiues me një OJQ zvicerane për ndërmjetësim në konflikte, u arrestua në qershor 2024 dhe u dënua për shkelje të ligjit rus për agjentët e huaj, në një rast të cilësuar nga Parisi si "arbitrar". Ai tani është implikuar në ato që duket se janë akuza të reja për spiunazh, të cilat mbartin një dënim deri në 20 vjet burg. Megjithatë, Rusia nuk ka dhënë detaje mbi rastin dhe nuk është e qartë nëse Vinatier është akuzuar zyrtarisht apo për çfarë akuzohet saktësisht. Gazetarët e AFP-së panë Vinatierin, të veshur tërësisht me të zeza, duke u sjellë nga agjentë sigurie me rroba civile në gjykatën e Lefortovos në Moskë për një seancë dëgjimore 20-minutëshe. Çuditërisht, media shtetërore ruse - e cila zakonisht ndjek nga afër rastet e profilit të lartë që përfshijnë të huaj - nuk raportoi për seancën dëgjimore të së hënës. "Nuk kemi absolutisht asnjë informacion të ri zyrtar", tha nëna e Vinatier, Brigitte Vinatier, për AFP-në nëpërmjet telefonit para seancës dëgjimore. Franca ka kërkuar lirimin e tij dhe e ka cilësuar çështjen si "arbitrare".Presidenti francez Emmanuel Macron i ka kërkuar Rusisë të lirojë Vinatier, duke thënë se ai po mbahet padrejtësisht dhe se "propaganda" kundër tij "nuk përputhet me realitetin". Parisi është një nga mbështetësit më të fortë të Ukrainës dhe Rusia e ka veçuar Francën si një shtet veçanërisht armiqësor gjatë konfliktit.