Rusët bombarduan një fabrikë amerikane në një sulm masiv ndaj Ukrainës që vrau një person dhe plagosi 23 të tjerë. Sulmi ajror ishte një nga sulmet më të mëdha të nisura nga Moska dhe erdhi më pak se një javë pasi Putin u takua me Trump për bisedime paqeje. Forcat ruse lëshuan të paktën 574 dronë dhe një breshëri prej 40 raketash në të gjithë Ukrainën perëndimore. Një pjesë e sulmeve shënjestronte Flex Ltd, e cila është një kompani amerikane dhe një nga prodhuesit më të mëdhenj të elektronikës në botë. Rusët bombarduan fabrikën në Zakarpattia, e cila ka qenë në funksion që nga viti 2012. Fabrika punëson mbi 2,600 persona, raporton The Kyiv Independent. Ministria ruse e Mbrojtjes tha se sulmet kishin në shënjestër ndërmarrjet e kompleksit ushtarako-industrial ukrainas, duke përfshirë fabrikat e dronëve, depot e magazinimit, vendet e lëshimit të raketave dhe zonat ku ishin mbledhur trupat ukrainase. Por presidenti ukrainas Volodymyr Zelensky akuzoi Moskën se praktikisht kishte sulmuar një kompani amerikane që prodhon pajisje shtëpiake, asgjë ushtarake. "Rusët e dinin saktësisht se ku i po i lëshonin raketat. Ne besojmë se ky ishte një sulm i qëllimshëm kundër pronës dhe investimeve amerikane në Ukrainë. Sulm i fuqishëm, pikërisht kur bota pret një përgjigje të qartë nga Rusia për negociatat për t'i dhënë fund luftës", tha Zelenski.