Një dhuratë nga sheshxhirimi i filmit "Troja", një replikë gjigante e Kalit të Trojës ngrihet mbi portin e Çanakkalesë në Ngushticën e Dardaneleve në Turqinë perëndimore. Fillimisht e rrëfyer nga Homeri, pastaj e ritreguar për ekranin e madh në vitin 2004, me Brad Pitt në rolin e Akilit, legjenda e qytetit të lashtë udhëton këtë javë në Koloseun e Romës, ku një ekspozitë e re e madhe hapet të premten. E etur për të shfaqur rrënjët anadollake të qytetit, Turqia ka dhënë hua më shumë se 220 objekte që do të shfaqen në ekspozitën "Troja dhe Roma", e cila zgjat deri në mesin e tetorit. "Kur lexon Homerin, nuk ke një ide shumë të qartë për identitetin e trojanëve. Por në kohën e Luftës së Trojës, ata ishin me siguri mes popujve anadollakë", thotë Reyhan Korpe, zëvendësdrejtoreshë e gërmimeve të Trojës dhe eksperte e historisë së lashtë në Universitetin e Çanakkalesë. E vendosur në bregdetin e Egjeut, të Turqisë, rrënojat e Trojës janë një vend i Trashëgimisë Botërore i mbrojtur nga UNESCO, i përbërë nga 185 hektarë tokë të mbushura me lulekuqe. Për 30 vjet, Korpe ka ecur në çdo cep të këtij vendi, shtresat e të cilit tregojnë historinë e nëntë vendbanimeve të ndryshme, mbetjet e të cilave janë të ndërthurura dhe të vendosura njëra mbi tjetrën. Troja u themelua në vitin 3,000 para Krishtit dhe ishte i banuar vazhdimisht derisa u braktis në shekullin e gjashtë pas Krishtit. Lufta e Trojës, e cila u zhvillua rreth vitit 1200 para Krishtit dhe zgjati 10 vjet, deri në rrethimin dhe humbjen e qytetit - pjesë të së cilës tregohen në Iliadë - "ishte përballja e parë mes Lindjes dhe Perëndimit". Nga qindra objekte që Turqia i ka huazuar ekspozitës së Romës, më shumë se 100 vijnë nga muzeu i Trojës, disa prej të cilave do të ekspozohen për herë të parë.