Mesazhet nga Brukseli dhe Berlini po bëhen gjithnjë e më të drejtpërdrejta ndaj Beogradit në lidhje me politikën e saj gjeopolitike. Kancelari gjerman, Friedrich Merz i ka bërë thirrje presidentit të Serbisë, Aleksandar Vuçiç, që të mos përpiqet të mbajë një politikë të balancuar mes Rusisë, Kinës dhe Bashkimit Evropian. Sipas Merz, një qasje e tillë nuk është më e qëndrueshme në kontekstin aktual gjeopolitik, ku tensionet ndërkombëtare dhe ndarjet politike janë thelluar. Ai theksoi se vendet që synojnë anëtarësimin në Bashkimin Evropian duhet të jenë të qarta në orientimin e tyre dhe të përafrohen me politikat dhe vlerat e BE-së. “Nëse Serbia e sheh të ardhmen e saj në Bashkimin Evropian, atëherë duhet të tregojë qartë se është e gatshme të ndjekë këtë rrugë pa ekuivok”, tha Merz. Ai shtoi se dera e Bashkimit Evropian mbetet e hapur për Serbinë, por se kjo derë nuk është automatike dhe kërkon vendime të qarta politike, reforma të brendshme dhe harmonizim me politikën e jashtme të unionit. Presidenti serb pas samitit të zhvilluar ditën e premte në Tivat, tha se u diskutua zgjerimi i BE-së dhe marrëdhëniet me Ballkanin Perëndimor. Ai deklaroi se Serbia mbetet e përkushtuar në procesin e integrimit evropian, por njëkohësisht do të vazhdojë të mbrojë interesat e saj kombëtare dhe politikën e saj të jashtme.