Nën sloganin “Dashuria është ligj”, pjesëtarë të komunitetit LGBT zhvilluan në Beograd Paradën e Krenarisë për këtë vit. Qindra persona kanë marshuar nëpër rrugët kryesore të kryeqytetit serb, duke kërkuar që të miratohet ligji, i cili u mundëson pjesëtarëve të këtij komuniteti, të regjistrojnë martesa mes personave të së njëjtës gjini. Qëllimi i Paradës së këtij viti, siç është thënë nga organizatorët, ka qenë rritja e vetëdijes për rastet e dhunës dhe diskriminimit kundër anëtarëve të këtij komuniteti. Kërkesat janë bërë edhe para ndërtesave të Qeverisë dhe Parlamentit, afër të cilave kanë marshuar aktivistët. Kjo është Parada e parë e Krenarisë që është mbajtur në Beograd, prej shpërthimit të pandemisë së koronavirusit në fillim të vitit 2020. Paraprakisht ishte kërkuar që parada të zhvillohej duke respektuar masat kundër pandemisë. Pjesëmarrësit mundën të marrin pjesë në paradë vetëm me certifikatë të vaksinimit kundër koronavirusit, test negativ në këtë virus, apo dëshmi se kanë kaluar sëmundjen COVID-19, që shkakton koronavirusi në gjashtë muajt e fundit. Testet e shpejta po ashtu kanë qenë të disponueshme në qytet. Në mesin e pjesëmarrësve kanë qenë, Komisionarja për Mbrojtje të Barazisë, Brankica Jankoviq, ambasadori amerikan në Beograd, Anthony Godfrey dhe shumë ambasadorë nga vende të Bashkimit Evropian. Prej vitit 2014, Paradat e Krenarisë janë organizuar pa incidente në Serbi, ndonëse nën masa të rrepta të sigurisë. Policia ka bllokuar grupet e krahut të djathtë që t'i afrohen vendit ku është mbajtur parada.