Policia ka arrestuar 29 vjeçarin Shkëlzen Bytyçi të shpallur në kërmim për mashtrime kompjuterike. Një muaj më parë, Policia e Tiranës gjatë operacioni ‘Transferta’, vuri në pranga 9 persona, e në vijim të hetimeve është shpallur në kërkim edhe Shkëlzen Bytyçi, pasi ka rezultuar se ishte i implikuar në këtë veprimtari kriminale. Për 29 vjeçarin Bytyçi, Gjykata kishte vendosur masën e sigurimit “Arrest në burg”, për veprën penale “Mashtrim kompjuterik”. Sipas njoftimit të policisë Bytyçi në bashkëpunim me të arrestuarit e tjerë, për një periudhë një vjeçare, ka ndërhyrë në llogari të ndryshme të rrjetit social Facebook, duke ndryshuar të dhënat e tyre dhe më pas i kanë përdorur për të komunikuar me miq të këtyre llogarive. Me anë të mashtrimit kanë kërkuar shuma të ndryshme monetare dhe si rezultat kanë përfituar shumën 38.000 euro. Sipas gjasave në këtë skemë kanë qenë të përfshirë edhe persona të tjerë veç 10 të arrestuarve, pasi policia njofton se po vijon puna për identifikimin dhe arrestimin e personave të tjerë të përfshirë në këtë aktivitet të kundërligjshëm.