Norvegjia do të shpenzojë 11.5 miliardë euro për të rinovuar flotën e saj ushtarake detare. Kjo është shuma që Oslo do të paguajë për Britaninë e Madhe për ndërtimin e të paktën pesë anijeve të reja luftarake. Marrëveshja përfshin dorëzimin e disa frigatave të tipit 26, që janë edhe ndër mjetet më të fuqishme të flotës ushtarake britanike. Ministria e Mbrojtjes në Londër e konsideroi ujdinë e arritur si më të madhin të këtij llojit të arritur ndonjëherë dhe tregues të besimit të aleatëve te industria ushtarake britanike. Qeveria britanike tha se marrëveshja do të mbështesë 4 mijë vende pune dhe mbi 400 biznese në më shumë se 2 mijë kantiere detare ku do të ndërtohen anijet deri në vitin 2030. Norvegjia, një prej vendeve themeluese të NATO-s ka rritur ndjeshëm shpenzimet për ushtrinë dhe mbrojtjen e saj pas shpërthimit të konfliktit në Ukrainë. Oslo ka nënshkruar kontrata për rinovimin e flotës së saj ajrore, detare dhe për pajisjen me nëndetëse dhe teknologji të tjera ushtarake.