Më shumë se 500 punonjës në agjencinë që menaxhon Zërin e Amerikës dhe transmetues të tjerë ndërkombëtarë të financuar nga qeveria amerikane do të humbasin vendet e punës, njoftoi një zyrtar i administratës Trump. Drejtoresha ekzekutive në detyrë e Agjencisë Amerikane për Median Globale (USAGM), Kari Lake, njoftoi shkurtime të mëtejshme të vendeve të punës në VOA në platformën e mediave sociale X. "Agjencia Amerikane për Median Globale (USAGM) ka nisur atë që njihet si një reduktim i personelit (RIF) të një numri të madh të punonjësve të saj federalë me kohë të plotë. Pres me padurim të ndërmarr hapa shtesë në muajt e ardhshëm për të përmirësuar funksionimin e një agjencie shumë të përkeqësuar dhe për të siguruar që Zëri i Amerikës të dëgjohet jashtë vendit, aty ku ka më shumë rëndësi”, shkroi Lake.