Në një raport që drejtoria hetimore antimafia ka dorëzuar në parlamentin italian, zbulohet se si krimi i organizuar ka ndryshuar. Cosa Nostra, Camorra dhe Ndrangheta, punojnë në të njëjtën kohë për të zgjeruar kapacitetet e ndikimin, por e bëjnë këtë gjithnjë e më shumë në sinergji me të ashtuquajturat Këmisha të bardha, duke zëvendësuar dhunën me linja veprimi të infiltrimit të heshtur. Në thelb, shpjegojnë ekspertët e drejtorisë së hetimit anti mafia, DIA, të gjitha organizatat mafioze kanë përshpejtuar procesin e transformimit që në fakt ka nisur prej kohësh, por ka hequr dorë sidoqoftë nga dominimi në territor dhe nga presionet frikësuese që i garantojnë atyre njohje në kuptimin e fuqisë kriminale. Dëshmi e këtij zhvillimi janë edhe të dhënat: në krahasim me vitin 2019, është regjistruar së fundmi një rënie e vrasjeve në tip mafioz dhe grupeve mafioze, por nga ana tjetër ka një rritje të krimeve të kryera me sipërmarrje të paligjshme, infiltrime në sektorët e prodhimit dhe përvetësim të fondeve publike. Episodet e korrupsionit kanë shënuar rritje, e po ashtu edhe elementë të tjerë. E në një kuadër të tillë, përvec sektorëve tradicionalë të interesit, shantazh, përvetësim dhe trafik droge, mafia tani është orientuar në sektorët e lojërave të fatit dhe basteve, edhe falë mundësive të ofruara nga teknologjia. Ata janë bërë sipërmarrës të distancuar nga klanet, ngrenë shoqëri në parajsa fiskale dhe krijojnë kështu një qark paralel me atë ligjor që u lejon jo vetëm të fitojnë më shumë por edhe të riciklojnë në mënyrë anonime sasi shumë të mëdha parash.