Në fund të një jave plot kthesa tani francezët e dinë, që Emmanuel Macron nuk do ta zgjidhë krizën që ka mbërthyer prej muajsh politikën as me shpërbërjen e Asamblesë Kombëtare dhe as me dorëheqje. Në vend të kësaj presidenti Emmanuel Macron përsëri ngarkoi me krijimin e qeverisë kryeministrin në detyrë Sébastien Lecornu. Riemërimi i Lecornu-s tani shuan shpresën e partisë socialiste, që ta ketë ajo kryeministrin. Që nga zgjedhjet e parakohshme parlamentare në verën 2024 Macron nuk ka më forcë politike në Asamblenë Kombëtare me një shumicë të mjaftueshme. Macron deri tani i ka varur shpresat tek një kryeministër nga radhët e veta. Por si Michel Barnier ashtu edhe François Bayrou u rrëzuan nga parlamenti. Të premten Macron ftoi në pallatin e Elizeut drejtuesit e partive, për të gjetur një zgjidhje të krizës politike. Javën e ardhëshme duhet të kalojë në parlament buxheti për vitin 2026, në mënyrë që të respektohet afati kushtetues. Agjencitë e vlerësimit të riskut dhe përfaqësues të ekonomisë janë të shqetësuar për stabilitetin në Francë në sfondin e borxheve të larta shtetërore dhe zhvillimeve politike. Tensionet ndizen kryesisht lidhur me tema, që prej vitesh po e përçajnë Francën: politika sociale, mosha e pensioneve dhe disiplina buxhetore. Socialistët, votat e të cilëve mund të vendosin për fatin e qeverisë së re, e kanë rritur presionin ndaj presidentit. Nëse Lecornu nuk e "pezullon menjëherë dhe plotësisht reformën e pensioneve", ai do të rëzohet nga parlamenti. Vëzhguesti flasin për akrobaci politike në Paris. Lecornu nuk mund të veprojë duke e injoruar tërësisht të majtën, e njëkohësisht ai nuk duhet të tregojë asnjë dobësi kundrejt kampit të presidentit. Nuk dihet ende se si do të jetë kabineti II i Lacornu-s ndërkohë që ditët e fundit disa të besuar të Macron-it janë distancuar nga ai. Ish-kryeministri Édouard Philippe, partia e të cilit deri tani kishte ministra, kërkon madje dorëheqjen e presidentit. Ministri i Brendshëm Bruno Retailleau, njëkohësisht edhe kryetari i republikanëve, ka deklaruar, se nuk do të jetë më pjesë e kabinetit të ri, edhe ministra të tjerë po tentojnë hapur të tërhiqen. Ndërkohë, sipas sondazheve të fundit, dy të tretat e francezëve kërkojnë dorëheqjen e presidentit. Por Macron e përjashton këtë. Ai thotë, se do ta përmbushë mandatin e tij deri në pranverën e vitit 2027.