Ish-Presidenti amerikan Joe Biden po i nënshtrohet radioterapisë si pjesë e trajtimit të tij për kancerin e prostatës, tha një zëdhënës i tij. Zëdhënësi tha gjithashtu se Biden, 82 vjeç, po i nënshtrohet trajtimit hormonal, pa dhënë detaje të mëtejshme. Trajtimi me rrezatim pritet të zgjasë pesë javë, tha një burim për NBC Neës. Në maj, zyra e Biden njoftoi se ai ishte diagnostikuar me një formë më agresive të sëmundjes, e cila ishte përhapur në kockat e tij. Zyra e Biden tha në atë kohë se "ai u diagnostikua me kancer të prostatës me metastaza në kockë. "Ndërsa kjo përfaqëson një formë më agresive të sëmundjes, kanceri duket se është i ndjeshëm ndaj hormoneve, gjë që lejon një menaxhim efektiv", thanë burimet sipas të cilëve ish-presidenti është mirë dhe po i përgjigjet trajtimit. Ndërkohë, CBS ka cituar një tjetër burim që thotë se rrezatimi filloi "disa javë më parë" në Filadelfia. Biden u largua nga detyra në janar si presidenti më i vjetër në detyrë i SHBA-së në histori dhe pyetjet rreth shëndetit të tij e përndoqën në mandatin e tij të parë, duke e bërë atë të përfundonte garën për rizgjedhje në mesin e fushatës së tij. Ish-nënkryetarja e tij, Kamala Harris, kandidoi në vend të tij duke humbur përballë Presidentit aktual të SHBA-së, Donald Trump.