Vendet anëtare të Bashkimit Evropian filluan të zbatojnë një sistem të ri hyrjeje dhe daljeje të dielën në kufijtë e jashtëm të bllokut, duke regjistruar elektronikisht të dhënat e shtetasve që vijnë nga jashtë BE-së. Sistemi i Hyrjes dhe Daljes (EES), është një sistem i automatizuar që kërkon që udhëtarët të regjistrohen në kufi duke skanuar pasaportën e tyre dhe duke u marrë gjurmët e gishtërinjve dhe fotografitë, do të zbatohet gjatë gjashtë muajve. Ky veprim synon zbulimin e personave që kanë tejkaluar afatin e qëndrimit, kanë mashtruar me identitetin si edhe synon parandalimin e migrimit të paligjshëm mes presionit politik në disa vende të BE-së për të marrë një qëndrim më të ashpër. "Sistemi i Hyrjes dhe Daljes është shtylla kurrizore dixhitale e kuadrit tonë të ri të përbashkët evropian të migracionit dhe azilit", tha Komisioneri Evropian i Çështjeve të Brendshme dhe Migracionit, Magnus Brunner, në një deklaratë. Qytetarët nga jashtë BE-së do të duhet të regjistrojnë të dhënat e tyre personale kur hyjnë për herë të parë në zonën Shengen, që përfshin të gjitha vendet anëtare të BE-së përveç Irlandës dhe Qipros, por duke përfshirë Islandën, Norvegjinë, Zvicrën dhe Lihtenshtajnin. Udhëtimet pasuese do të kërkojnë vetëm verifikim biometrik të fytyrës. Sistemi duhet të jetë plotësisht funksional, me vulosjen e pasaportave të zëvendësuar me të dhëna elektronike, më 10 prill 2026. "Çdo shtetas i një vendi të tretë që mbërrin në një kufi të jashtëm do t'i nënshtrohet verifikimit të identitetit, kontrollit të sigurisë dhe regjistrimit në bazat e të dhënave të BE-së", tha Brunner, duke shtuar se "zbatimi gjashtëmujor u jep shteteve anëtare, udhëtarëve dhe bizneseve kohë për të kaluar pa probleme në procedurat e reja".