Aktorja fituese e çmimit Oscar, Diane Keaton, është ndarë nga jeta në moshën 79 vjeç. Keaton, e cila lindi në Los Angeles, u bë e famshme në vitet 1970 përmes rolit të saj si Kay Adams-Corleone në filmat The Godfather. Ajo ishte gjithashtu e njohur për rolet kryesore në filma të tjerë, përfshirë Babai i nueses, Klubi i Grave të para dhe Annie Hall, i cili i dha asaj çmimin Oscar për Aktoren më të Mirë në vitin 1978. Për Annie Hall, Keaton fitoi gjithashtu çmimin Golden Globe për Aktoren më të Mirë në një Film Komedi ose Muzikal dhe çmimin BAFTA për Aktoren më të Mirë në një Rol Kryesor. Gjatë karrierës së saj që zgjati për më shumë se pesë dekada, Keaton luajti në dhjetëra filma të tjerë, duke përfshirë The Family Stone, Because I Said So, And So It Goes, si dhe në një numër filmash të Ëoody Allen, si Play It Again, Sam, Sleeper, Love and Death dhe Manhattan. Keaton gjithashtu drejtoi disa filma, i pari prej të cilëve ishte një dokumentar i vitit 1987, Heaven, që fliste për besimet e njerëzve për jetën e përtejme. Si në rolet e saj në filma ashtu edhe në jetën e saj personale, Keaton ishte e njohur për stilin e saj unik. Ajo nuk u martua kurrë dhe pati dy fëmijë të adoptuar - një vajzë dhe një djalë.