Një gjykatë greke ka akuzuar 17 oficerë të rojes bregdetare për një nga fundosjet më të rënda të anijeve në Mesdhe dy vjet më parë, ku besohet se u mbytën qindra njerëz, thanë të premten tre burime. Mbytja e një anijeje të tejmbushur me emigrantë në ujërat ndërkombëtare pranë qytetit jugperëndimor grek Pylos më 14 qershor 2023, shkaktoi tronditje në të gjithë Evropën dhe më gjerë. Gjykata greke është ende duke hetuar rrethanat e incidentit. Një anije e rojes bregdetare kishte monitoruar anijen e quajtur Adriana, për 15 orë para se të përmbysej dhe të fundosej. Ajo ishte nisur nga Libia për në Itali me rreth 750 persona në bord. Vetëm 104 prej tyre kanë mbijetuar. Autoritetet e rojes bregdetare greke kanë mohuar vazhdimisht çdo shkelje në lidhje me trajtimin e çështjes. Tre burime ligjore thanë se 17 oficerët e rojes bregdetare do të thirren nga një gjykatës për t'iu përgjigjur akuzave që variojnë që nga pengimi i transportit deri te shkaktimi ose ndihma në shkaktimin e fundosjes aq anijes. I kontaktuar nga Reuters, një zyrtar i rojes bregdetare greke tha se shërbimi nuk ishte informuar zyrtarisht për akuzat dhe kishte kërkuar të informohej nga gjykata. Sistemi gjyqësor i Greqisë ka disa faza përgatitore dhe përpilimi i akuzave nuk do të thotë domosdoshmërisht që një individ do të përballet me gjyqin. Aktivistët e të drejtave të njeriut dhe protestues të tjerë planifikojnë tubime në të gjithë Greqinë më 21 qershor për të shënuar përvjetorin e dytë të mbyturjes së anijes në Pylos. Në shkurt, Avokati i Popullit në Greqi rekomandoi masa disiplinore kundër tetë oficerëve të rojes bregdetare, në hetimin e parë kombëtar për incidentin. Greqia thotë se roja bregdetare vepron duke respektuar të drejtat e njeriut dhe se ka shpëtuar më shumë se 250,000 njerëz që nga viti 2015, kur vendi ishte në vijën e parë të krizës së migracionit në Evropë.