“Prishtina dhe kryeministri i institucioneve të përkohshme të Prishtinës, Albin Kurti, zgjodhi rrugën e dhunës dhe të vendimeve e veprimeve të njëanshme”. Kështu deklaroi drejtori i Zyrës për Kosovën në Serbi Petar Petkoviç pas mbylljes së institucioneve dhe komunave paralele nga qeveria e Kosovës në dhjetë komuna. Në një postim në X, ai shkruan se “mbyllja e dhunshme e një numri të madh të komunave tona, qendrave për punë sociale, postave është tregues i qartë pse Besnik Bislimi nuk është paraqitur sot në Bruksel”. “Në Bruksel më erdhi lajmi për sulmin e madh të Kurtit ndaj institucioneve serbe. Kam ardhur me delegacionin e Beogradit me qëllim që sot të zgjidhim çështjen e personave të zhdukur, ndërsa Kurti dhe Prishtina zgjodhën rrugën e dhunës dhe të njëanshme. Ky lloj terrori e vë në pikëpyetje vetë dialogun. Është e qartë se Kurti nuk është i vetmi fajtor për këtë!”, ka shkruar Petkoviç. Në Bruksel, Kosova përfaqësohet në këtë takim nga Halil Cenaj dhe jo nga zv.Kryeministri Besnik Bislimi.