Pas gati një viti, Kryeministri i Kosovës, Albin Kurti, dhe presidenti i Serbisë, Aleksandar Vuçiç, do të takohen në Bruksel. Takimi mes liderëve të dy shteteve do të mbahet më 26 qershor, në kuadër të një raundi të ri dialogu për normalizimin e marrëdhënieve me ndërmjetësimin e Bashkimit Europian. Lajmi është konfrmuar nga zëdhënësi I Bashkimit Europian, Peter Stano, ndonëse ende nuk ka detaje mbi këtë tryezë të re dialogu. Ajo çfarë mësohet është se ky takim i nivelit të lartë do të ndërmjetësohet nga përfaqësuesi i lartë i bllokut për politikë të jashtme dhe siguri, Josep Borrell, dhe i dërguari i posaçëm për dialogun, Mirosllav Lajçak. Po ashtu mësohet se dakordësimi për këtë raund të ri bisedimesh dhe takimin Kurti-Vuçiç, është rënë dakord gjatë takimeve të Lajçak në Kosovë e Serbi.