“Deklarata Trilaterale për Mbrojtjen dhe Sigurinë synon forcimin e stabilitetit të Evropës Juglindore dhe thellimin e marrëdhënieve tona miqësore”, ka qenë kjo përgjigja e drejtëpërdrejtë e ministrit kroat të mbrojtjes Ivan Anushiq, ndaj pretendimeve të presidentit serb Aleksander Vuçiç, se Shqipëria, Kroacia dhe Kosova po zhvillojnë aleancë të përbashkët ushtarake kundër saj. Anushiq, shkroi përmes një postimi në Facebook se Kroacia dhe Shqipëria “ndajnë interes të përbashkët” për paqen, sigurinë dhe stabilitetin në Evropën Juglindore. Duke iu referuar drejtpërdrejt pretendimeve të liderit serb, ministri kroat Anushiq theksoi se ai e ka përgjigjen e “njëjtë gjithmonë” kur pyetet për reagimet nga Serbia: “Ka kaluar koha kur dikush i tregonte Kroacisë, tashmë shtet sovran dhe anëtar i NATO-s dhe BE-së, çfarë të bëjë dhe si ta drejtojë politikën e vet. Ajo kohë nuk do të kthehet më kurrë!”, përfundon postimin Anushiç.