Në një intervistë për revistën TIME, të botuar të premten por të zhvilluar më 22 prill, presidenti amerikan, Donald Trump, fajësoi Ukrainën për fillimin e luftës. "Mendoj se ajo që shkaktoi fillimin e luftës ishte fakti që ukraina nisi të flasë për anëtarësimin në NATO", tha ai. Planet e paqes që Trump po ndjek do t'i jepnin Vladimir Putinit rreth 20% të territorit ukrainas, sipas raportimeve më të fundit ndërkohë që për revistën Time, trump konfirmoi se "Krimea do të qëndrojë me Rusinë", duke iu referuar gadishullit të aneksuar në mënyrë të paligjshme nga Rusia në vitin 2014. Në shkrimin e gjatë me rastin e 100 ditëve të Donald Trump në Shtëpinë e Bardhë, Times thekson se presidenti biznesmen, ka të ngjarë të mbahet mend për përmbysjen e madhe të politikës së jashtme amerikane, duke u armiqësuar me aleatët e NATO-s dhe duke mbajtur anën e Rusisë në luftën e saj me Ukrainën. Trump krenohet në intervistë se ka mobilizuar evropianët për të kontribuar më shumë në sigurinë e tyre dhe ka çuar përpara paqen mes Izraelit dhe disa fqinjëve arabë në mandatin e tij të parë. Ai shpreson të bëjë përparim të mëtejshëm në këtë front të fundit në një udhëtim të planifikuar në Lindjen e Mesme. Ai, shkruan Times, ndihet më i sigurt, më ambicioz, më pak i kufizuar sesa në mandatin e tij të parë si Komandant i Përgjithshëm. “Herën e kaluar po luftoja për mbijetesë”, i thotë ai revistës. “Këtë herë po luftoj për botën”.