Rektorët e shtatë universiteteve publike në Kosovë kanë marrë vendimin që viti i ri akademik 2020/2021 të nisë në 1 tetor me një format të kombinuar pas situatës që ka krijuar pandemia e koronavirusit në vend. Përmes një konference për shtyp, rektorët shpjeguan se është vendosur që provimet e pranimit për studentët e rinj dhe provimet e tjera të mbahen në ambientet e fakulteteve, ndërsa leksionet, konsultimet dhe aktivitetet e ndryshme të zhvillohen në distancë. Përgjatë kësaj konference u tha se për shkak të shtyrjes së Provimit të Maturës në datën 29 gusht, viti akademik për studentët e rinj mund të fillojë me dy muaj vonesë. Kryeministri, Avdullah Hoti bëri të ditur ditë më parë se hapja e institucioneve tjera shkollore do të varet nga gjendja epidemiologjike. Sipas tij, Ministria e Arsimit dhe Shkencës dhe Instituti Kombëtar i Shëndetësisë Publike në Kosovë po përgatisin udhëzuesin për mënyrën e organizimit të vitit të ri shkollor nga 1 shtatori. Që prej 13 marsit, kur janë raportuar rastet e para, autoritetet shëndetësore në Kosovë kanë regjistruar 11,545 persona të infektuar me koronavirus. Prej tyre 410 kanë vdekur.