Zyrtarët e qeverisë së Kosovës diskutuan sot me kryetarët e komunave për bashkërendimin e aktiviteteve dhe menaxhimin e situatës së pandemisë me theks të veçantë tek fillimi i vitit të ri shkollor. Plani, sipas ministrit të arsimit Ramë Likaj, është në fillim I mësimit me faza: në 1 shtator nisin fillimisht parashkollorët dhe klasat e para, të dyta e të treta, pastaj faza e dytë është në 7 shtator dhe tjetra, tre ditë më pas ku parashikohet mësimi për shkollat e mesme. Likaj sqaroi se janë përgatitur tre skenarë, dhe u mbetet komunave të zbatojnë njërin prej tyre. Skenari A-parashikon rikthimin në ambientet shkollore të nxënësve, Skenari B - mësimin e kombinuar në klasë dhe në distancë, ndërsa skenari I tretë lidhet vetem më ketë të fundit. Janë përgatitur po kështu edhe udhëzimet e përgjithshme për fillimin e vitit shkollor 2020/2021 në kushtet e kujdesit ndaj pandemisë së COVID -19.Kryeministri i Kosovës, Avdullah Hoti tha pas takimit me kryetarët e komunave se nuk pritet të ketë lehtësim të masave kundër pandemisë në Kosovës, sepse "pavarësisht faktit që ekziston një rënie e të infektuarve, sërish numri i viktimave mbetet i lartë".