Zgjidhja më e mirë e mundshme midis Serbisë dhe Kosovës është përmes dialogut, në të kundërtën, mund të shihet një konflikt i llojit të Nagorni Karabakut. Kjo është deklarata e bërë nga presidenti serb, Aleksander Vucic, paraditen e të enjtes, që ka nxitur një mori reagimesh në kosovë dhe jashtë saj. Ushtruesja e detyrës së presidentit, Vjosa Osmani, tha se pret që Bashkimi Evropian dhe NATO-ja të reagojnë ndaj “kërcënimit” të Vuçiqit për “luftë të dhunshme”, ndërsa kryeministri Avdullah Hoti tha se deklarimet e presidentit të Serbisë nuk janë në dobi të normalizimit të marrëdhënieve midis dy vendeve. Ndërsa ministri i diasporës në shqipëri, Pandeli Majko, e konsideroi deklaratën të papërgjegjshme. “Deklarimi i Presidentit të Serbisë për karakterizimin e marrdhënieve me shtetin e Kosovës me statusin e konfliktit të ngrirë të Nagorni Karabak është i papërgjegjshëm. Jeta e dyfishtë e Serbisë në marrdhëniet ndërkombëtare është rreziku real për stabilitetin rajonal! Presidenti Vucic përcaktoi se konflikti me shqiptarët nuk ka mbaruar ende dhe e konsideron atë "të ngrirë”. Për majkon, deklarata e Vucic përbën shmangje nga marrëveshja e firmosur në shtëpinë e bardhë dhe procesi i integrimit evropian. Aleanca e NATO-s në anën tjetër, nuk ka pranuar të komentojë deklaratën e vucic, por ka konfirmuar se ajo vazhdon të mbështesë dialogun mes kosovës dhe serbisë, dhe e konsideron atë zgjidhje të vetme të përhershme politike për stabilitetin në Kosovë dhe në rajon.