Kosova po shton masat e sigurisë në kufi me Serbinë, në vendkalimin kufitar Bërnjak, fill pas zbarkimit të trupave ruse në territorin ukrainas, ashtu sikurse deklaruan më herët presidentja e Kosovës, Vjosa Osmani, dhe kryeministri Albin Kurti Sipas njoftimit zyrtar të policisë së Kosovës, janë dërguar pajisje logjistike dhe kontenierë në vendkalimin kufitar Bërnjak, të cilat, do t’i shërbejnë policisë kufitare. Bërnjaku ndodhet në veri të Kosovës, dhe policia deklaroi se po punon ekskluzivisht në interes të sigurisë së qytetarëve dhe krijimit të një ambienti të sigurt. Menjëherë pas shtimit të masave të sigurisë në kufirin verior të Kosovës, ka reaguar Zyra për Kosovën e qeverisë së Serbisë, e cila e ka konsideruar këtë aksion një provokim të rrezikshëm dhe tentativë për destabilizim të situatës në rajon. Në deklaratën e kësaj zyre thuhet se Policia e Kosovës, 80 metra nga vendkalimi në Bërnjak, ka sjellë makineri të rënda dhe trupa ushtarakë për forcimin e postbllokut policor në vendkalim. “Veprime të tilla të njëanshme dhe të papërgjegjshme të Prishtinës kanë vetëm një qëllim: të provokojnë një destabilizim të ri të situatës në terren, në një moment shumë të ndjeshëm për sigurinë, me të cilin po përballet e gjithë bota”, thuhet në deklaratën e Zyrës për Kosovën në Qeverinë e Serbisë. Ajo tha se i bën thirrje Prishtinës që të mos e provokojë Beogradin dhe serbët në Kosovë dhe të mos rrezikojë paqen dhe sigurinë, duke shkelur marrëveshjen.