Pekini nuk e pranon një shitje të detyruar të operacioneve të TikTokut në SHBA nga pronari kinez, ByteDance dhe thotë se më mirë do të preferonte që aplikacioni për video të mbyllej në Shtetet e Bashkuara. Tre burime pranë Reuters pohuan se Kina e kundërshton shitjen. Mësohet se ByteDance ka qenë në bisedime t’ia shitur biznesin disa blerësve të mundshëm që përfshijnë Microsoft dhe Oracle. Zyrtarët kineze besojnë se kjo do ta bëjë vendin të duket I dobët përballë presioneve të Ëashingtonit në sytë e shtetasve të tij. Presidenti amerikan Donald Trump i ka lënë afat ByteDance mesin e shtatorit për vulosjen e një ujdie. Vetë ByteDance thotë se qeveria kineze nuk i kishte sugjeruar kurrë që ajo të mbyllë TikTokun në SHBA apo në ndonjë treg tjetër. Dy burime thanë se Kina ishte e gatshme të përdorte ndryshimet që bëri në një listë të eksporteve të teknologjisë në 28 gusht për të vonuar çdo marrëveshje të arritur nga ByteDance, nëse do të duhej. Ajo mendohet se mund të marrë dhe veprime ligjore për të parandaluar shitjen e TikTokut bizneseve amerikane.