Shtetet e Bashkuara të Amerikës thonë se do të refuzojnë ose revokojnë vizat për zyrtarët palestinezë që dëshirojnë të udhëtojnë në Nju Jork muajin e ardhshëm për të marrë pjesë në seancën e Asamblesë së Përgjithshme të OKB-së. Sekretari i Shtetit Marco Rubio i fajësoi ata për minimin e përpjekjeve për paqe dhe për kërkimin e "njohjes së njëanshme të shtetit palestinez". Vendimi është i pazakontë - Shtetet e Bashkuara, si vend pritës, duhet të lehtësojnë udhëtimin për zyrtarët e të gjitha vendeve që duan të vizitojnë selinë e OKB-së. Megjithatë, është e paqartë nëse ky veprim i Uashingtonit për të refuzuar ose revokuar vizat është në përputhje me dokumentin, i cili përcakton se pjesëmarrja e zyrtarëve të huaj në Nju Jork nuk do të pengohet nga SHBA-të "pavarësisht nga marrëdhëniet" midis qeverive të tyre përkatëse dhe Uashingtonit. Riyad Mansour, Vëzhguesi i Përhershëm palestinez në Kombet e Bashkuara, pas lajmit tha se do të shohim saktësisht se çfarë do të thotë dhe si zbatohet për cilindo nga delegacionet tona kjo masë e SHBA. Ndalimi vjen ndërsa Franca kryeson përpjekjet ndërkombëtare për të njohur shtetin e Palestinës në seancën e Asamblesë së Përgjithshme. Administrata e Donald Trump e ka mbështetur plotësisht Izraelin në kundërshtimit e një veprimi të tillë. Kryeministri izraelit, Benjamin Netanyahu, hedh poshtë idenë e një zgjidhjeje me dy shtete - formula ndërkombëtare e gjatë për të zgjidhur konfliktin Izrael-Palestinë. Ai thotë se njohja e shtetit palestinez do të ishte shpërblim i "terrorizmit monstruoz të Hamasit".